وندوز بنكهة ماك

بهالبوست حبيت اشرحلكم اشلون تسون الدوك مثل الماك عندكم بالوندوز مثل هذا

هالفيديو بكمبيوتر ماك ليبورد

انا الصراحه هالشغله شكثر عجبتني من الماك وبيوم من الايام حصلت هالبرنامج

فقلت خلني اشارككم فيه بس المشكله الدوك يكون لونه اسود والستارت بار مال الوندوز لونه ازرق

يمكن ماراح تمشي الالوان ومايطلع حلو

فنزلت برنامج ثاني وكاامل مايحتاج تشترونه :>

تقدرون تغيرون ستايلات الوندوز على راحتكم

هاذي صور الدسكتوب مالي

طبعاً ماله داعي تدورون على البرامج ولا شي انا نزلتهم لكم بالفورشيرد

اول شي تحتاج حق هالبرنامج

ObjectDock 19

اضغط اهني عشان تنزله

تسويله انستول كامل

وانقل الايكونز الي تبيهم بالدوك

وعشان تخفي الايكونز icons

الي بالدسكتوب اضغط رايت كلك

بعدين arrange icons by

وشيل الصح عن Show Desktop Icons

وراح تختفي الايقونات

ولا تنسى تنقل الايكونز المهمين الي تبيهم للدوك

بعد ماتخلص الحين تحتاج لبرنامج يغير الثييم مال الوندوز عشان يكون لونه قريب يم لون الدوك

نزل برنامج

TuneUp_Utilities

اضغط اهني عشان ينزل

لما ينزل راح تلقى السيت اب ماله وتلقى نوت فيه السيريال نمبر مال البرنامج عشان يصير كامل

وهذا شرح فيديو نزلته لكم باليوتيوب وللأمانه مو انا الي مسوي شرح الفيديو هذا :>

وبعد ماتخلص نقولك على البركه على الشكل اليديد :>

واي سؤال او اي استفسار حاضرين كتبو بالكومنتس

اكاذيب ** تحذير لأصحاب القلوب الضعيفه بعدم مشاهدة الصور

** تحذير لأصحاب القلوب الضعيفه بعدم مشاهدة الصور **

ايميل وصلني وعجبني وحبيت اشارككم فيه

------------------------------

السلام عليكم و رحمة الله وجدت هذا الموضوع في أحد المنتديات و أحببت نقله لكم هذه القصة حدثت لثلاثة شباب في الصحراء في بلدة .........

:كان الثلاثة خارجين للبر وكان أحدهم للأسف يشرب الدخان ويستمع الى الغناء وفجأة أثناء سيرهم وحدهم في الصحراء الشاسعة سمعوا صوتا جهوريا يناديهم قائلا "أهلا بتلميذي" فالتفتوا حولهم في خوف وأخذ هذا المدخن يرتجف لانه أحس انه هو المطلوب وتكرر هذا النداء مرتين فرفع الشباب رؤوسهم ليفاجأوا بهذا الوجه الرهيب ينظر لهم من السماء ليكتشفوا ان الشيطان هو الذي ينادي على هذا الشاب

فأخرج الشاب المدخن كاميرته ليصور هذا الوجه (وقد كان هداه الله يتهاون في موضوع التصوير أيضا) وعندما فعل ذلك اذا بصاعقة تنزل من السماء لتحرقه فيفر صاحباه في خوف ثم بعد أربعة أيام تحضر الشرطة لتعثر على جثة الشاب محترقة ومتعفنة أكرمكم الله والكاميرا سليمة وقد طارت على بعد 300 متر من مكانه ، وقد اصيب ضباط الشرطة بالاغماء لبشاعة الجثة بينما فر الجنود هاربين ، وقد تكتمت السلطات على الأمر حتى لايصاب أهالي المنطقة بالفزع وهكذا اخواني كانت نهاية هذا الشاب المدخن المستمع لمزامير الشيطان انشرها وجزاك الله خيرا لتعم الفائدة اخواني الكرام هذا الموضوع المنشور هو نموذج سئ لبعض المواضيع التي يطلع علينا بها بين الحين والحين بعض الشباب الله اعلم بنياتهم على انها تحذير وتخويف للناس من المعاصي فنقوم بارسالها عبر الايميل ووضعها بالمنتديات ثم نكتشف بعد فترة أنها كانت كذبا في كذب ولكن بعد أن يكون قد ضحك منا أعداؤنا وشبعوا ضحكا وقد قرأت في احدى الصحف أن هناك جمعية معينة هدفها نشر مثل هذه الخزعبلات وسط الشباب لصرفهم عن الدين الصحيح وفيما يلي امثلة من هذه الحوادث التي ثبت كذبها جميعا

1. - قصة الفتاة العمانية التي تحولت لعنزة مشوهة لانها استهترت بقراءة القرآن الحقيقة : الصورة هي صورة عمل فني لفنانة فرنسية
2. - قصة الشاب الذي فتحوا قبره بعد 3 ساعات فوجدوه متفحما من اثر عذاب القبر ونشرت صورة الحقيقة : الجثة لفتاة سعودية احترقت في حادث
3. - صورة الجني الذي قام شاب اماراتي بتصويره في كهف ومات الشاب مباشرة بعد تصويرهالحقيقة : الجني عبارة عن نحت متقن في احد الكهوف وعيونه متصلة بمفتاح كهربائي لاضاءة العينين باللون الاحمر

4- في احد المستشفيات الامريكية جهاز رسم القلب لأحد المرضى يرسم كلمة الله الحقيقة : منتدى يهودي هو صاحب الاشاعة ليضحك منا

5- اسلام مايكل جاكسون .الحقيقة : مايكل جاكسون يعلن احترامه للاسلام ولكنه ينفي الدخول فيه . (ان الله لغني عن العالمين) .اخواني دين الاسلام اكتمل بوفاة النبي صلى الله عليه وسلم ولايحتاج لمثل هذه القصص والاوهام ليقتنع به الناس فنرجو من كل واحد أن يتأكد من أي شئ يصله قبل نشره بين الناس

-------------------------

تعليقي:

شكثر ناس تصدق اي شي موجود بالنت او سمعو عنه الصوره الي طافت اذكر كانت موجوده من سنة 2000

وتوه ينجلي الستار عن هالصوره وشكثر سمعنا قصص عنها بس اكثر قصة تداولوها قصة الشباب الي بالامارات براس الخيمة

واتمنى انكم ماتصدقون اي شي ينقال

وشكراً

اخوكم :

Q8Disaster

How to put YouTube Video in Blog Post

بناءاً على طلب اختنا العزيزة خروفه

حبيت اعلمكم اشلون تحطون مقطع فيديو من اليوتيوب بالبوست للي مايعرف طبعاً :>

اول شي تروحون للفيديو الي تبون تحطونه بالبوست

تلقون على اليمين كلمة Embed

تنسخون الكود الي بالمربع الي بدايته

object width

وتروحون لصفحة البوست

وتضغطون على Edit Html

وتحطون الكود بأخر شي

اخر شي تردون على Compose

وتغيرون مكانه

وتحطونه بالمكان الي يعجبكم :>

وهذا فيديو للتجربة

وانشالله اكون وفقت بالشرح اي احد يبي مساعدة احنا حاضرين :>

عيدكم مبارك

الحل لغلاء الاسعار

** تحديث في نهاية البوست

تفاعلاً مع اخوانا Lil Alien

في بوسته عن غلاء اسعار البيض

حبيت اقول كلمتي هاذي :-

------

بس لي متى واحنا نسكت ونطالع هالحراميه الكبار يرفعون بهالاسعار

كل يوم يرفعون علينا شي ملابس, عيش ,خبز ,بيض ,ككاو ,طحين ..الخ

ياجماعه المسكين الي على قد حاله ويالله عنده فلوس يوكل عياله ويعيشهم

هذا باجر اشلون بيعيش ؟؟

التاجر بيقول هاذي مو مشكلتي

بالله شيسوي المسكين؟؟

يهاجر يعني ؟ يموت ؟ يبيع عياله؟ يسرق؟ يذبح نفسه ويوكل عياله من لحمه؟

والله ترى هالمساكين اذا بيسون شي لا تلومونهم والله غصبن عليهم.

لازم نوقف وقفه ضد التجار ونقولهم بضاعتكم هاذي نقعوها وشربوا من مايها

الحل ياجماعه اننا نقاطع بضايعهم

تخيلوا اهل البيض هذيله اذا محد شرا منهم بيضهم لمدة 20 يوم بيخيس بيضهم

ومصيرهم غصبن عليهم بينزلون سعره وبيترجونا عشان نشتري منهم

واللي مايقدر يعيش الا بالبيض هذا اقوله الله لايهينك روح سوق الحمام واشتر ديجين و10 ديايات

وتهنى بالبيض الطازج من الديايه لي بوئك

انا عجبتني حكمه للفاروق عمر بن الخطاب رضي الله عنه وارضاه

جاء الناس إلى عمر بن الخطاب -رضي الله عنه - وقالوا : (غلا اللحم فسعره لنا ، فقال: أرخصوه أنتم ؟ )

فقالوا :نحن نشتكي غلاء السعر واللحم عند الجزارين ونحن أصحاب الحاجة فتقول :أرخصوه أنتم ؟

وهل نملكه حتى نرخصه ؟وكيف نرخصه وهو ليس في أيدينا ؟)

قال :اتركوه لهم..

صدق عمر بن الخطاب رضي الله عنه.

والامام علي ابن ابي طالب كرم الله وجهه بعد عطانا حل اخر

وهو الاستبدال

( قال: حدثنا القاسم بن مالك عن يوسف بن دراقس قال : حدثني مغيرة بن عطية عن رزين بن الأعرج مولى لآل العباس

قال : غلا علينا الزبيب بمكة فكتبنا إلى على بن أبى طالب بالكوفة أن الزبيب قد غلا علينا , فكتب أن أرخصوه بالتمر )

أي استبدلوه بشراء التمر الذي كان متوفرا في الحجاز وأسعاره رخيصة فيقل الطلب على الزبيب فيرخص

وصدق ايضا الامام علي ابن ابي طالب

بيضهم هذا خلوه لهم مانبيه خله يتعفن عندهم ومصيرهم بينزلون بسعره

اسمحولي الشعار كان بالسريع ومسوي فورمات ومومنزل فوتوشوب لوول

***

واحد من الشباب دش جمعية الاتحاد اعتقد هذا اسمها في دبي

لقا معلقين صوب رف البيض اعلان مكتوب فيه: نظراً لأرتفاع سعر البيض من المنتجين قررت الادارة عدم بيعه وشكراً.

هذا التصرف اهو الصحيح ووانشالله بتشوفون اشلون بينزل سعر البيض وانا انشالله بصور هالاعلان وبحطه عن قريب

وهاذي صورة اعلان ثاني منقولة من مدولة الاخ يعقوبوو

شي حلو انا نشوف جمعياتنا يتصرفون التصرف الصحيح

***

وانا حاب اشوف ارائكم

وشكرا

اللقافه والتفلسف مشكله!!

مشكله لما الواحد يتفلسف ويسوي نفسه شوماخر

:>

مابي اتشمت براعي الصوره بس شالله ملقفك تدخل السياره دامك ماتعرف

وبعد محاولات عديده

هم ماقدرو المساكين

وبالاخير طلعه الونش من مصيبته :>

هالصور بمحطة ادنوك في شارع الامارات :>

هذا بوست سريع عالماشي واسمحولي عالقصور

:")

رحلتنا الى عمان

** تحديث اضافة بعص الصور :>

اليوم موضوعي بيكون طويييل واسمحولي اذا مليتو :> لأني بسولف عن رحلتي لخصب بعمان

وفي البداية ابارك لأخوانا في دولة الامارات العربية المتحدة بمناسبة العيد الوطني ال36

**

و عطونا الجامعة عطلة ليوم الاحد والاثنين :>

وبما ان احنا ماردينا لكويت مثل باجي الشباب الكويتيين

قلنا على الاقل نزور عمان بالتحديد منطقة خصب

طبعا هالمنطقة الجو عندهم مشالله مو طبيعي المهم حركنا من الامارات عالساعه 6 ونص احنا 7 شباب خليجيين :> 3 كويتيين 2 اماراتيين 2 سعوديين ناقصنا عماني وبحريني وقطري وبس نصير مجلس التعاون الخليجي لوول المهم طلعنا بسيارتيين

ووصلنا الحدود الاماراتيه العمانيه عالساعه 8 ونص مركز الحدود الي بينهم واحد بس يجيكون على الجوازات ومايختمونهم وخذو علينا تأمين لعمان بأمية درهم لمدة عشر اياممااطول عليكم , الطريج من الحدود لي خصب اعتقد تقريبا ساعه ونص

وصلنا خصب اعتقد 10 لقينا محطة بانزين فيها مطعم اسم المطعم يغري طبعا الصورة خذيتها اليوم الثاني الصبح :>الي ضحكنا اسمه ظبي اليمن ومافي ولا واحد من الي يشتغلون يمني :> وحتى مندي وعيوش ماكو لووول بس صمون طبعاً المطعم حده خواره تحسفنا ان كلينا منه لو شارين من البقاله خبز وجبن ابرك والله بس مانقول الا الله يديم علينا النعمه

طلعنا من المطعم قلنا بنشوف لنا مكان نقعد فيه لقينا مكان قوي وحلو عالبحر وورانا جبل

الجو حزتها عجييب براااد ااحنا اكيييد مانسينا ناخذ معانا لبس شتوي نطرنا عايلة يمشون وخذينا مكانهم :>حطينا خيمتنا وبسطتنا وقعدنا وشبينا النار وضبطنا القهوه وحلى الجو للسوالف اليوم الثاني قعدنا وخذيتلي جم صوره حق البحر ومكانا :>

**

عالساعه 9 الصبح طلعنا برحلة بحريه بطراد ودخلنا بخور نسيت شسمه بس بين جبال

الجو كان حلو براد والمكان حده قوي طبيعه وجبال واجانب اشكثر كانو مجودين طالعين بلجنات سياحيه

**

هذيله صور تيوس مادري شلون وصلو هالمكان يعني لو يطيحون على طول بالبحر لوول

بالرحله زرنا جزيرة تلغراف وعلى كلام راعي الطراد يقولنا ان بهالجزيرة كان موقع الاتصالات بالحرب العالمية وكان فيها كل اجهزة الاتصالات وهاذي صورها

اهني واحنا على الجزيره :>

**

هذا لنج سياحي

الغربيه في ناس ساكنين بهالجبال الي مافيها شي والحكومه توصلهم ماي بتوانكي وراح تشوفون هالبيوت وفي ناس مسويله سكن بفتحات صغيره بالجبل لدرجة ان هالفتحات ماتكفي ثلاث اشخاص شكلهم بس ينامون فيها

انا بس بعرف هذا شلون رفع هالطراد لي فوق لوول

المهم ردينا عالساعه 1 الظهر رحنا تغدينا وبعدين قلنا بنستكشف المكان وصفلنا راعي الطراد مكان نصعد فيه الجبال رحنا على وصفه بس الطريج حده مو شي وماتقدر تصعد الجبل الا بسيارة فور ويل

4x4 والا تتوهق :>

20واهني صورة واحنا على ارتفاع 1300 من على سطح البحر ودرجة الحراره

وهالصوره بعد واحنا على ارتفاع 1400 من على سطح البحر ودرجة الحراره 17 شفتو الفرق :>

**

***

مشالله في ناس عايشين فوق الجبل سبحان الله مادري شلون عايشين لا انترنت ولا بلوغز :p

***

طبعاً قالولنا نقدر بهالطريج نرجع للأمارات الطريج حده وعر ونصيحه الي يخاف من المرتفعات لايروووح من هالطريج لأنه بتحوشه جلطه من الارتفاع يعني الارض تحتك بكيلو ونص :>وهاذي الخريطه

لوول يمكن يحطونها بمادة الاجتماعيات وانشالله عجبتكم حركة مفاتيح الخريطه :p

والحمدلله وصلنا الامارات عن طريق دبا بعد بساعه وشوي
والحمدلله على سلامتنا ومن التعب حطينا راسنا ونمنا :>
وانشالله عاد مااكون مللتكم من السوالف والقرقه

وناطر تعليقاتكم عالرحله :>